សម្តេច ហ៊ុន សែន ជឿថា កម្ពុជា​ទទួល​ផល​ពី​ការរីកចំរើន​របស់​វៀតណាម​

សម្តេច​តេជោ ហ៊ុន សែន និយាយថា នៅ​ឆ្នាំ​កន្លង​ទៅ​គំរោង​វិនិយោគ ដែល​ប្រទេស​វៀតណាម​បាន​លើក​ឡើង​មាន​ទំហំ​ទឹកប្រាក់​ជិត ១ ពាន់​លាន​ដុល្លារ​អាមេរិក ហើយ​នៅពេល​ប៉ុន្មាន​ឆ្នាំ​ខាងមុខនេះ នឹង​មាន​ទំហំ​ទឹកប្រាក់​ប្រមាណ​ជាង ៦ ពាន់​លាន​ដុល្លារ ទៅ ៧ ពាន់​លាន​ដុល្លារ​អាមេរិក ។ រីឯ​ការផ្លាស់ប្តូរ​ពាណិជ្ជ​កម្ម រវាង​ប្រទេស​ទាំង​ពីរ នឹង​មាន​ការកើនឡើង​ថែម​ទៀត​លើសពី ២០០០ លាន​ដុល្លារ​ក្នុង ១ ឆ្នាំ តាមរយៈ​នៃ​ការជំរុញ​ការវិនិយោគ​រវាង​ប្រទេស​ទាំង​ពីរ ក្នុងនោះ​គឺ​កម្ពុជា​ទទួល​តាមរយៈ​ការរីកចំរើន​នៃ​សេដ្ឋកិច្ច​របស់​វៀតណាម ។​

​ ​សម្តេច​តេជោ ហ៊ុន សែន បាន​មានប្រសាសន៍​នេះ​នៅក្នុង​ពិធី​បញ្ចុះ​បឋមសិលា​សាង​សង់​មន្ទីរពេទ្យចឺ​រី ​ភ្នំពេញ ដែល​ធ្វើឡើង​នា​ព្រឹក​ថ្ងៃទី​១៥ ឧសភា​នេះ ។ លោក ជឿ​ង វិញ​ជិង (Truong Vinh Trong) ឧបនាយក​រដ្ឋ​វៀតណាម និង​លោក ឡេ ខា​ភាវ អតីត​អគ្គលេខាធិការ​បក្ស​វៀតណាម បាន​ចូលរួម​នៅក្នុង​ពិធី​នោះដែរ ។

​ សម្តេច​តេជោ​មានជំនឿថា វៀតណាម នឹង​ក្លាយទៅជា​កូន​នាគ​អាស៊ី​នាពេលខាងមុខ ព្រោះ​វៀតណាម មាន​ការរីកចំរើន​យ៉ាងខ្លាំង ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ ។ ដូចនេះ​កម្លាំង​ទិញ​របស់​វៀតណាម​កាន់តែ​ខ្លាំង ហើយ​កំរិត​នៃ​ការ​ផ្គត់​ផ្គង​របស់​វៀតណាម ដែល​កម្ពុជា​មាន​តម្រូវការ​ក៏​មាន​កម្លាំង​កាន់តែខ្លាំង ដែល​នឹង​ធ្វើឲ្យ​កិច្ចសហប្រតិបត្តិការ​លើ​វិស័យ​នេះ​ទ្រទ្រង់​ទៅលើ​ កិច្ចសហប្រតិបត្តិការ ក្នុង​វិស័យ​នយោបាយ និង​វិស័យ​ដ៏ទៃទៀត ៕